通常烹調蔬菜之前要做啲咩？除左要買菜，當然就係洗乾淨蔬菜。但你又識唔識洗菜？細細個聽老媽子講:「要將啲菜葉分開用水洗，最後拎一大盤水浸30分鐘，就咩污糟野汁都浸晒出黎！」。但事實上照呢個方法洗菜，原來分分鐘會愈洗愈毒！
浸乾淨仲點解仲有毒?
大多數蔬菜表面都會有少量嘅泥沙、細菌、甚至是殘留農藥。當我地將蔬菜菜浸起水入面，菜表面嘅農藥多為水溶性農藥，會溶於水中，令整盤水慢慢變成帶有殘留農藥的毒水。經過過長時間浸泡，毒水會經過菜嘅根部（如圖紅色箭嘴所示）滲入去。所以浸得越耐，菜入面嘅農藥含量就會越多，本來健康清甜的新鮮蔬菜變成毒菜。正確清洗方法可以幫我地去除蔬菜表面大多數殘留農藥及有害細菌。相反，錯誤清洗方法會導致農藥殘留、更進一步積聚起蔬菜入面。例如長時間浸菜。
網絡圖片
唔想食毒菜，菜要點洗先好?
其實唔難，只要跟住呢幾個步驟，你都可以成為洗菜達人。
用洗手液、番梘清洗你對手，最少洗20秒，洗走手上嘅細菌
記住菜肉分開洗
唔好將啲菜葉搣開或切開。將菜葉搣開或切開，就等於𠝹開一個傷口，等農藥更容易在沖洗過程流入去菜入面。就好似你𠝹親手指，細菌都會容易啲進入你嘅身體
開住水喉頭，用水沖走表面嘅泥土。如果沖唔走啲泥土，都可以用手指或軟毛刷幫手。水會直接將大部份泥沙、細菌及農藥沖走，呢個步驟好重要，建議重複三次
一般都唔建議浸菜。如果你怕啲菜有蟲（例如西蘭花），你都可以試下呢個方法：將菜浸水，再加一羹鹽浸5-10分鐘，之後再用水沖一沖就OK
網絡圖片
洗菜小百科
洗菜係用凍水？定還是熱水？
我會建議用凍水，即常溫水就可以。因為水溫過熱會破壞蔬菜入面嘅維他命C。而維他命C係天然嘅抗氧化劑，能夠幫助我地降低患有壞血病嘅風險。加上並沒有研究證明用熱水洗菜可以更有效清潔蔬菜。
網絡圖片
用蔬菜清潔劑洗菜先夠乾淨？
蔬菜清潔劑是沒有必要的。有研究指出，清水已經足以清洗蔬菜表面大部份泥沙、細菌。如果你用蔬菜清潔劑洗菜，清潔劑有機會殘留起蔬菜表面。
菜洗極都仲係有沙，點算好？
洗菜嗰陣可以大力少少。浸完菜（5-10分鐘），直接將啲菜拎起身，唔好直接倒水因為啲泥沙會沉底，倒水時又會將泥水倒番落菜的表面。
唔同種類蔬菜洗菜建議
有葉嘅菜（例如菜心、生菜、芥蘭、油麥菜、白菜仔）：
翻開啲菜葉（唔係搣開啲菜葉），開住水龍頭，用水沖走表面嘅泥土、細菌、農藥（可以用手捽，沖洗2-3次）。煮之前先搣開、切開啲菜葉。
包葉嘅蔬菜（西生菜、椰菜）
先搣開最外層嘅菜葉，開住水龍頭，用水沖走表面嘅泥土、細菌、農藥（可以用手捽，沖洗2-3次）。再將啲菜搣開一片片，逐片沖洗（唔好拎去浸）。煮之前先切碎啲菜葉。
西蘭花、椰菜花：
開住水龍頭，用水沖走表面嘅泥土、細菌、農藥（沖洗2-3次）（可以用牙刷刷洗表面）。再準備一盆清水（可以浸過啲菜），將一茶匙嘅鹽倒入去個盆到。再將西蘭花、花椰菜放入去個盆到，浸5-7分鐘，啲蟲就會出嚟。煮之前先切開啲菜葉。
瓜類：（例如南瓜、合掌瓜、苦瓜、茄子）
用清潔毛刷刷洗表面，開住水龍頭，用水沖走表面嘅泥土、細菌、農藥（大概洗2-3次）。煮之前先再批皮、切開一嚿嚿。
根莖類（例如蓮藕、蘿蔔）：
用清潔毛刷刷洗表面，開住水龍頭，用水沖走表面嘅泥土、細菌、農藥（大概洗2-3次）。煮之前先再批皮、切開一嚿嚿。