炎炎夏日，相信大家都開始準備「減肥大計」。發覺成日都聽到身邊朋友同媒體都講「想減肥就唔好食咁多飯啦」，搞到連食飯都唔安樂。其實食飯係唔使驚，因為飯（澱粉質）對於我哋嚟講好重要，只要控制好個份量，我哋都可以食得滋味又健康。
減肥一定要戒澱粉質？例如飯、麵？
其實唔係，只要你當天攝取嘅熱量< 當天消耗嘅熱量，理論上你就係減緊肥。只要你適當減少澱粉質（飯、麵、包）嘅吸收量，保持充足睡眠，做多啲運動，你就一定可以減肥。除左食少啲澱粉質，都要食少啲零食、飲少啲珍珠奶茶 （熱量高、好多糖，容易肥），原意就係食少啲糖分。
「碳水化合物」「澱粉質」「糖」「醣」
我地成日提起嘅葡萄糖係一種「糖」（「糖」會有甜味，例如葡萄糖、果糖），係我哋身體能量最主要嘅來源。就好似一架汽車需要汽油先可以行，而我哋亦都需要葡萄糖（汽油）先可以行。最近我地都會聽到嘅「醣」就係「碳水化合物」。碳水化合物能夠為我哋身體提供能量，維持身體正常運作。碳水化合物種類繁多，而澱粉質就係其中一種。例如，飯就係其中一種澱粉質。食完飯，啲飯就會被我哋嘅身體消化，最終分解成體積細，又容易吸收嘅葡萄糖，再為我地提供動力。
碳水化合物種類
碳水化合物都分為好多種，主要分為單糖、雙糖、多糖。
單糖：體積細，容易吸收。例如葡萄糖、果糖同半乳糖
雙糖：單糖+單糖 = 雙糖。例如 蔗糖（白砂糖）、乳糖（牛奶）同麥芽糖
多糖：體積大，例如澱粉質、糖原同纖維素
點解唔好戒澱粉質？
因為澱粉質係我哋身體最主要嘅能量來源，如果你完全唔食澱粉質，身體就會吸收唔到足夠嘅葡萄糖，缺乏足夠能量維持大腦、身體正常運作。特別會容易頭暈、造成免疫力下降等。假如你減緊肥，食得少，又唔食澱粉質。身體就會分解肌肉（蛋白質），為身體提供能量，越來越少肌肉，新陳代謝會降低、免疫力下降、容易四肢無力。所以我地都要確保番吸收到足夠嘅澱粉質。
減醣電飯煲係咪可以幫我哋減肥？
理論上可以。減醣電飯煲煮出嚟嘅飯嘅醣（例如澱粉質）會係普通電飯煲煮嘅75%，食少左澱粉質，咁就可以幫到我哋減肥。點解減醣電飯煲可以減少澱粉質？請留意下一篇文章~
Comments