食住飯都可以減肥? 減醣電飯煲原理破解 |識揀識食




有無人鐘意食飯?但又驚食得多會肥點算?有人話:「不如試下減醣電飯煲,佢可以減少飯入面嘅澱粉質。」減少澱粉質?真係有咁樣嘅電飯煲?係唔係呃鬼食豆腐㗎?今日,我哋就一齊拆解減醣電飯煲,睇下佢係咪真係有用。


減醣電飯煲原理

減醣電飯煲和傳統電飯煲外形相似,但有些少唔同。減醣電飯煲入面會多左一個隔篩(可以升降,類似升降邊爐鍋)。煮飯嘅過程同普通電飯煲差唔多,唯一唔同嘅地方就係……煮到一半,減醣電飯煲嘅隔篩會自動上升,將米同米水分開,減少醣分(澱粉質)。理論上,米含有大量澱粉質,雖然澱粉質難溶於冷水,但係熱水會同澱粉質產生反應 (糊化作用),令到澱粉質溶於熱水。當飯煮到一半,少量澱粉質(2-3%)會溶於米水。減醣電飯煲隔篩將米同米水分開,變成蒸熟啲米(米水入面嘅澱粉質唔會再俾米吸收)。咁樣,同一碗飯入面嘅澱粉質就會少啲,我哋就可以吸收少啲熱量(卡路里)


同時,減醣電飯煲比一般要落多啲水,當飯吸收更多水,體積會變大。例如,同一杯米(100g),普通電飯煲可以煮到200g飯(一碗飯),但減醣電飯煲可以煮到270g飯(一碗半飯)。只要你都係食一碗飯,咁你就吸收少左35%嘅醣(澱粉質)。就好似煲粥,同一碗粥入面嘅米變相會少啲(粥會稀啲,澱粉質少都會少啲)。



減醣電飯煲真係可以幫我哋減到肥?

老生常談,當日攝取熱量(卡路里)< 當日消耗熱量,你就會變瘦。小編覺得,減醣電飯煲就好似一個輔助工具,佢可以幫你吸收少啲澱粉質,吸收少啲熱量。但同時都需要你控制飲食,做多啲運動,咁先可以減到肥。

用減醣電飯煲煮飯,營養會唔會流失?

會,因為米含有少量維他命B(水溶性維他命,溶於水)。減醣電飯煲會將米同米水分開,導致少量維他命B,不過就算流失對我哋嘅影響都不大。如果你真係驚吸收唔夠維他命B,可以食多啲肉、奶製品,一樣可以補充番。

(網絡圖片)


減醣電飯煲值唔值得買?

相比起買減醣電飯煲,其實食少啲飯都可以做到同樣嘅效果。但如果你唔想食少啲飯,但又想減少醣分嘅攝取,減醣電飯煲都不失為一個好方法。

78 次瀏覽

​妳想煮意

電郵: contact@festyle.hk​​ 
電話: 5647 6260​​ 

​食物製造廠牌照號碼:2992807560

妳想煮意鳴謝以下機構及基金支持
 

© 2020 by Festyle