臨近端午節，屋企一定收到唔少糉。鹹肉糉、鹼水糉、豆沙糉…… 聽到呢到，係唔係流曬口水呢？你又鐘唔鐘意食糉？小編我就最鐘意食鹹肉糉。有陣時阿媽會話：「仔呀，唔好食咁多糉，食得多會變成肥豬。」其實，只要你「識揀識食」，就無問題。
(網絡圖片)
點樣揀一隻又健康又好味嘅糉？
有人會問：「係唔係所有糉都係唔健康？如果我想食健康啲，咁應該點樣揀？」我哋盡量選擇一啲低熱量、低脂肪嘅糉，例如低糖豆沙糉。豆沙糉，材料主要係糯米、紅豆、糖。每一隻低糖豆沙糉熱量大概係300卡路里（≈ 一碗半白飯）。而一隻鹹肉糉 (300g) 嘅熱量（大概係600卡路里，≈ 3碗白飯）。如果你鐘意食肉糉，可以試下雞肉糉。相比起鹹肉糉，雞肉糉熱量較低、脂肪較少，係一個唔錯嘅選擇。
(網絡圖片)
獨食 or 分享？ 一次過食曬 or 分開幾次食？
食之前，諗一諗。問下自己：「你係想試味？還是想當正餐？會唔會將一隻糉分開幾次食？」
食糉，你鐘意加豉油還是加糖？
有啲人鐘意加糖，有啲人鐘意加豉油，你又鐘意加啲咩？小編我就會選擇咩都唔加，點解？因為我想食得健康啲。一隻正常大細嘅鹹肉糉 (300g)，大概有800 毫克嘅鈉 （≈ 世衛標準嘅一半）。人體長期吸收過量鈉，會損害腎、增加高血壓嘅風險。豉油屬於高鈉調味品，少食為主。大多數糉都屬於高熱量食物，加糖只會令我哋吸收額外嘅熱量。（簡單啲嚟講，會更容易肥）。
(網絡圖片)
糉可唔可以當正餐？注意事項？
可以。例如，一隻300g 鹹肉糉嘅熱量有600卡路里 （幾乎等於每日所需卡路里嘅三分之一）。如果我哋選擇鹹肉糉作為我哋嘅午餐（可以同菜一齊食），晚餐就要食少啲嘢（食少啲飯）。腸胃不適人士盡量避免將糉當正餐。糉含有大量糯米，比較難消化，容易引起消化不良。同時，糯米屬於高升糖指數食物，糖尿病患者要留意食用份量。
食完糉會唔會即刻肥左？
唔一定，只要你當天攝取嘅熱量 ≤ 當天消耗嘅熱量，你就唔會變肥。但如果你當天攝取嘅熱量 ＞ 當天消耗嘅熱量，多餘嘅熱量就會轉化為脂肪，儲存喺體內。只要控制好熱量嘅吸收，就唔使驚會變肥。食糉之餘，都要記得食多啲蔬果、飲多啲水，做多啲運動。
(網絡圖片)
Comments